Xuntanza veciñal

O sábado día 29 teño convocada unha xuntanza veciñal na Escola de Lama de Prado para tratar o problema do acceso por ADSL na zona de Santa Leocadia, Pasadán, Veredo, etc.

Falei con varias persoas e puxen carteis pola zona pero agradezoche que corras a voz se estás interesado no problema.

En principio a miña idea é expor a situación actual e as perspectivas a corto plazo. Logo debatiremos as posibles medidas de presión a tomar para solicitar a ADSL. Finalmente penso presentar ós veciños outras alternativas técnicas para tratar de acadar acceso a Internet de alta velocidade, mentres non se acade o obxectivo da ADSL.

Mercadillo

O pasado domingo fun ó mercadillo que se celebra os terceiros domingos de mes en Taboadela dende o pasado verán.
Non se trata dun mercadillo moi concurrido nin con moita variedade (o 90% é roupa bastante inutil) pero a verdade é que me gustou.

O mercadillo non aporta moito á economía local, nin é unha alterantiva válida para mercar o que se necesita. Sin embargo valoro moi positivamente o feito de que constiua unha ocasión para que a xente se vexa e para que saia da casa, posto que sobre todo no inverno non é fácil vencer a pereza de estar todo o día a carón do lume.

Había un posto para mercar polbo e comer, un bo zapateiro con productos artesanais, un posto de ferretería e sobre todo moita roupa.

Como sempre aproveito para meterlle unha pulla ó concello imos aló con ela: nos accesos dende as carreteras locais faltaba u sinal indicando que a rúa estaba ocupada é que era preciso tomar camiños alternativos. Eso fixo que moitos conductores se atopasen de repente coa caseta do polbo ... menos mal que non houbo que lamentar desgracias!

Outra pulla: non podería o Concello tratar de traer a este mercadillo postos de artesanía tradicional, de productos ecolóxicos, ... algún me dira que me "chuto" pero por qué non de libros? (elaboración do viño, a horta ecolóxica, dieta saudabel, ...)

A crisis que a pague o capital!

Este é o lema da manifestación que a CIG convocou para hoxe xoves día 13 en todas as cidades de Galiza. Eu asistin á de Ourense. Facía un frio de coidado pero a verdade é que convocou a bastante xente.
Gustoume o discurso final do responsable da CIG en Ourense, Etelvino Blanco. Falou das empresas que queren aproveitar esta crisis para conxelar soldos e para despedir traballadores. Falou do "fin de semana" que vai disfrutar Zapatero para "refundar o capitalismo". Falou dos problemas que se están a vivir na comarca de Valdeorras. Falou de que so se fala de axudar aso bancos pero non se escoita nada sobre axudas social ou mantemento das pensións.

A miña opinión e que os noso gobernantes non queren entender o evidente: esta crisis é unha consecuencia directa da política economica liberalista, donde so rixe a lei da oferta e a demanda. Espero que a lo menos sirva para que volvamos a unha economía tutelada polo estado, que recuperemos o concepto de "servicios básicos", como o transporte, a vivenda, a educación e a sanidade, que deixemos a política de axudar aos ricos para que lle den traballo aos pobres, que recuperemos a primacía dos impostos directos sobre os indirectos. En definitiva que pasemos dun réxime capitalista a u réxime "proteccionista".

Xa vedes que son un utópico! seino, pero preciso selo: de ahí saco a enerxía para facer cada día algo polos demais a pesares ... imolo deixar asi.

Magosto no Centro de Maiores

O pasado venres asistin ao magosto que se celebrou no Centro de Maiores de Taboadela. Dende logo houbo castañas e viño, e música de pandeiretas.
Para min foi sobre todo un día para o recordo. Cantas partidas de subastado non botei no Mara! Como non recordar ó José, á súa dona e as súas fillas!
Foi un día para comprobar a sorte que teñen as persoas dese Centro, porque non pode haber outras traballadoras mais atentas, mais divertidas, mais boas persoas: todas e cada unha delas.
Na magosto tamén houbo nenos, a miña filla entre eles, que o pasaron de maravilla. Penso que para os maiores debeu de ser bonito velos correr por ali, tocar a pandeireta, pintarse cun tizón ...
So botei en falla que aparecese por alí algunha "autoridade", se cadra tiñan a axenda moi apretada, que se lle vai facer!

ADSL para todos

Como xa publiquei nunha nova previa en Taboadela temos por fin ADSL ... pero non todos. Nestas semanas recibin noticias de varias veciños de Lama de Prado, A Reguenga e Pasadaán que xa non saben que facer para que este servicio chegue ós seus fogares.

Todos aqueles veciños desa zona que leades este comentario, estedes interesados en contratar a ADSL e non podades, escribiídeme un correo dándome un número de teléfono porque teño a intención de convocar unha zuntanza veciñal cara finais da semana seguinte para tratar de conformar unha "agrupación de afectados" e decidir que podemos facer ... visto que dende o Concello so teñen unha resposta: "chamade a Telefónica".

Todas sabemos que "a unión fai a forza" asi que se conseguimos xuntar a bastante xente penso que podemos acadar resultados, ben sexa porque a Telefónica lle interese economicamente, ben sexa porque conseguimos que o Concello ou a Xunta nos fagan algo de caso (xa se sabes que os "votos" moven montañas) ou ben porque pasamos de todos eles e o solucionamolo nós por outros medios

Correde a voz!!!

Taboadela de luto: falece Recaredo Paz

O pasado domingo enterrouse no cemiterio de Taboadela o corpo de Recaredo Paz. Recaredo naceu e vivio durante moitos anos nun pobo deste Concello, Pumar.
Quedouse inválido dende moi novo a causa dunha malformación na columna pero esto non supuxo ningún obstáculo para el. Xa non digo para labrarse un futuro senón para ser un exemplo de persoas comprometida e defensora dos minusválidos.
A foto está tomada do xornal La Región do día 31-10-2008

Quero neste comentario recordar a súa etapa no Pumar, cando despachaba na tenda que o seu pai lle montou para que poidese vivir. Nunha época na que nin xiquera a carretara chegaba ó pobo, había que andar 1 kilómetro para atopar o asfalto.
Posto que estos días lle choven homenaxes dende todos lados quero dende aquí rendir tamén un profundo homenaxe a alguén moito menos coñecido, á súa nai Carme. Exemplo de muller rural, traballadora, calada, servicial, sufridora.

De momento non temos no concello monumentos, nin rúas e prazas con nome. Se hai alguén que mereza inaugurar esta honra sin dúbida é Recaredo. Quero pensar que a Corporación Municipal será tamén desta idea, senón recordarémosllo entre todos.

Descanse en paz, Recaredo Paz.

Anxo Quintana: candidato do BNG á Xunta

Este fin de semana celebrouse en Santiago a Asemblea Extraordinaria do BNG para elexir ao candidato á Presidencia da Xunta de Galicia. Taboadela estivo alí representada por Manolo e Xosé Antón (na foto).
Como non podía ser doutro xeito saiu elexido Anxo Quintana co 95% dos votos.
Ahora tocanos a todos axudar no que se poda para conseguir que Anxo sexa o próximo presidente da Xunta ... ou polo menos que o PP non recupere a maioría absoluta ... cara atrás so deberían de camiñar os cangrexos!!!

pleno ordinario de setembro

O pasado día 25 de setemnbro celebrouse o pleno ordinario do trimestre. Paso a resumirvos o mais destacado.

Ratificouse o proxecto dunha obra, que curiosamente xa está empezada ... e paralizada por patrimonio (ver este artigo de La Region): as beiraruas do primeiro tramo da carretera Taboadela-Pereiras.

Aprobouse una moción presentada polo PP sobre medidas de "aforro e austeridade" (conxelación dos soldos de alcalde e concellais, reducción de gastos de protocolo, ...). Eu apoieina pero agora mesmo estou mais de acordo co que fixo o compañeiro do VE-TA: rexietouna por considerala hipócrita posto que se pide despois de que o alcalde se subise o soldo un 80% o ano pasado.

Rexeitaronse todas as mocións presentadas pola oposición agás a de solicitar á Xunta o uso da liña de transporte escolar como transporte público... pena que o grupo de goberno non se decatase antes dista posibilidade como fixeron outros 50 concellos galegos que xa asinaron o convenio.

Acordouse adeherirse ó Grupo Avinza, xunto con outros 9 concellos da comarca, que se encargará de xestionar os fondos europeos para desenvolvemento local nos próximos anos.ç

Acordouse solicitar a creación dunha galescola dado que o nñumero de rapaces en idade 0-3 anos parace suficiente.

Aprobaronse mais obras de mellora no alumeado de Taboadela e Pereiras.

En cantos as preguntas que eu fixen non meu turno destaco o seguinte:
- ¿Por qué toas as obras que licita o Concello se conceden á mesma empresa, Ganade y Marra? Non me responderon nada concreto
- ¿De que un gasto de 1419 € que aparece dun spot de Telemiño? Ainda non saiu pero seica é "publicidade do Concello"
-Protestei polo feito de que a actividade administrativa do Concello se paralice no mes de agosto debido ás vacacións da secretaria. Responderonme que os trámites "sinxelos" están delegados na Auxiliar e que se siguen facendo, o resto ... pois non se fan.

O ADSL chega a Taboadela

Por fin temos alta velocidade en Taboadela. Eu soliciteina o venres, onte chegoume o modem e xa puden probala.
Contratei a velicidade mais alta, 6 Mbps, ainda que tamén se pode contratar 1Mbps. En realidade fixen unha proba de velocidade e deume 3.5 Mbs, o cal está bastante ben.
A instalación do modem é moi fácil pero se alguén ten algún problem eu podería axudalo.

Ahora ven a parte negativa ... o ADSL ainda non vai chegar á zoa que depende da centralita de Santa Leocadia. Eu prometo facer todo o posible para tratar de que eses veciños tamén podan acceder a este servicio. Xa vos irei informando disto.

Aprobado o PXOM

Segundo publica a páxina web da Consellería de Política Territorial onte, 17 de xullo, a Conselleira asinou a Orde de Aprobación Definitiva Parcial do Plan Xeral de Ordenación Municipal de Taboadela.
Esto significa que en canto se publique no DOG entrará en vigor. Logo faltaría que o Concello publique no BOP a normativa e mailas ordenanzas correspondentes.
O feito de que a aprobación sexa parcial siginifica que alguns aspectos concretos (ainda non sabemos cales) quedarán suspendidos mentres non se subsanen as correspondentes deficiencias.

Penso que é unha boa noticia para todos porque o Concello levaba anos parado por mor deste atranco. Esperemos que o Equipo de goberno do Concello sepa aproveitar esta oportunidade. Por parte do BNG ofrecemos toda a colaboración, posible.

Teño colgada unha copia do PXOM na seguinte dirección:
http://trevinca.ei.uvigo.es/~anton/arabeda/PXOM_Taboadela.zip (ocupa 154 Mb, se alguén quere que llo pase en CD que me escriba).

Xosé Antón Vila.
Concellal do BNG en Taboadela.

Grupos de Desenvolvemento Rural

O martes constituise en Allariz a Xunta Directiva do Grupo de Desenvolvemento Rural GDR-15.

Esta entidade, constituida por 10 concellos da comarca (Allariz, Maceda, Taboadela, Xunqueira, Vilar de Santos, ...) será o organismo encargado de seleccionar os proxectos que serán financiados polo LEADER europeo no periodo 2007-2013.

A diferencia do quinquenio anterior ahora participan nesa decisión non so os alcaldes dos concellos senón tamén as asociación de todo tipo, empresas, etc. En Taboadela as asociacións que están inscritas ata o momento son as asociacións de mulleres rurais de Santa Leocadia e A Rabeda, as asociacións veciñais de Perreiras, A Rabeda, Toran, Taboadela e Santa Leocadia, o club de futbol e o club de atletismo (espero non esquecerme de ningunha). A representante na Xunta Directiva será a asociación de mulleres rurais "As Abelairas".

Para mais información consultade a páxina http://agader.xunta.es

Piscina

A semana pasado abrironse as piscinas municipais, unha boa nova que leva figurando como "promesa" do alcalde polo menos 5 anos ... mais vale tarde que nunca!

A verdade é que o recinto quedou moi ben, boa piscina, moita herba, zonas de sombra, bar, vestiarios amplos.

Todos os censados no concello poden entrar de balde, sempre que fagan o carnet de usuario (hai que ir ó concello cunha foto e o DNI), e o resto pagarán unha entrada de 1 euro.

Pleno do Concello

O pasado xoves celebrouse o pleno ordinario de "verán". Lamentablemente para todos teño que decir que a principal nova foi o mal comportamento do Sr. alcalde, chegando a despreciar ó portavoz socialista e contestantando ó resto sen respeto algún. Vouvos por un exemplo.
Cando eu lle preguntei que significaban uns puntos pintados de amarelo na estrada Taboadela-Pereiras dixome textualmente "eso non cho contesto, averiagualo tu".
As dúas mocións que eu presentei, unha sobre a oportunidade de fomentar o compostaxe e o reciclaxe e a necesidade de facer recollidas de trastos, e a outra sobre a necesidade de mellorar os canles de información á veciñanza, foron rechazadas, salvo un único punto de colocar mais paneis informativos.
Pregunteille tamén sobre a posibilidade de asinar un convenio con Medio Rural, como fixeron outros concellos pero non parece que esten pola labor. O ano pasado non o aceptaron cando medio Rural lles ofrecía pagar o 70% dun tractor desbrozadora.

En fin, que os tempos cambian pero o noso Goberno Municipal non. Hai que ainda non se deu conta de que xa estamos no século XXI

Proxecto parque empresarial Val da Rabeda

Segundo informan os xornais de onte xa está a exposición pública o proxecto do parque empresarial do Val da Rabeda, a primeira fase que afecta ó noso concello pola construcción do Polígono Taboadela 1, na zona comprendida entre Mesón de Calvos, o río Barbaña e preto de Pazos. Eu ainda non tiven tempo de pasar a velo pero debería estar exposto no Concello.

Ahora é o momento de que o Concello mesmo, os grupos políticos, as asociacións veciñais e todos os particulares que queiran presenten alegacións ó proxecto. Hai dous meses para facelo.

Se vos vedes afectados e queredes contar coa nosa axuda non dubidedes en chamarnos.

Antón.

Día das letras galegas

Ainda que soio empregar este blog para comentar novas relacionadas con Taboadela, neste caso vou falar du asunto que afecta a todo o país.

O sábado día 17 celébrase o Día das Letras Galegas. Este ano está dedicado a Xosé María Alvarez Blazquz, un escritor en lingua galega e castelá nado en Tui. Foi membro da Real Academia Galega e fundador da editorial Castrelos. Sinto recoñecer que non teño lido nada del pero espero facelo polo menos o día 17. Mercarei algún periódico que traia algunha escolma súa de regalo! Tendes mais información sobre a súa persoa e sobre outros homenaxeados en outros anos en www.diadasletrasgalegas.com

Comentarvos tamén que o domingo día 18 as 12 haberá unha Manifestación en Santiago organizada pola Mesa pola Normalización Lingüistica en defensa do galego.

Por último comentarvos que ese día se celebra o Día Mundial das Telecomunicacións e da Sociedade da Información. Na dirección www.maisinternetmaisgalego.org tendes información das actividades que a Consellería de Innovación e Industria celebra en relación con dito evento (hai unha o mércores 14 en Ourense).

Perdoade este rollo pero estaba con gañas de escribir!

Antón.

O inventor do Parque Empesarial do Val da Rabeda

O pasado domingo lin un artigo publicado no Pais que me aclaraou unha cousa na que eu non caira, ¿quen foi o inventor do Parque Empresarial do Val da Rabeda?
Eu pensaba que o inventor do mesmo era o arquitecto Cesar Portela que foi quen de plasmar no papel unha idea de parque empresarial integrado no entorno, con actuacións integrais tamñen en vivenda, rehabilitación de nucleos rurais, etc. Pensaba tamén que o "inventor pai" era o propio Vicepresidente da Xunta, Anxo Quintana, que foi o impulsor deste proxecto, que previa xa o potencial desta zona cando pasaba por Taboadela no "coche de liña" que o levaba cara Ourense.

Pero non, estaba equivocado ... o pai deste proxecto é o Alcalde de Taboadela, quen dixo o pai !O Inventor!


--
Xosé Antón Vila
Tlf: 630 626767

I Plan de Igualdade do Concello de Taboadela

O pasado sábado asistin no Centro de Día á presentación do I Plan de Igualdade do Concello de Taboadela. Presentou o acto o Sr. Alcalde falando moito do Centro de Dia e nada de igualdade. Logo interviu a Asistente Social do Concello cunha charla moi atinada e ben preparada sobre o obxcetivo e actividades do plan. Por último intervou unha muller (non recordo o nome) experta en igualdade e violencia de xénero que tamén tivo unha intervención inetersante. Por último ofreceronnos un viño.
Deronnos un libriño a cada un que recolle as propostas de dito plan. Da lectura do mesmo eu deduzo que o noso concello vai ser a "repera", imos ser o exemplo de toda Galiza en canto a igualdade con actividades de formación, sensibilización, animación cultural, axudas económicas,...
O problema é que unha cousa é escribir esas cousas nun libro e outra polas en práctica. De momento nos presupostos deste ano eu non vin partida específica ningunha para desenvolvelo ... con que non sexa os miles de euros que costou a impresión do libriño de marras!

Xosé Antón Vila

Banda ancha

Se as previsións non se torcen para este verán pode que a banda ancha chegue a Taboadela. Hai un proxecto para levar á fibra óptica á central de Taboadela o cal permitiría a Telefónica ofertar liñas de ADSL.

O problema é que non vai a chegar a todo o Concello. Os veciños que dependan da central de Santa Leocadia (Santa Leocadia, A Reguenga, Pasadan, etc) non van poder acceder a este servicio. No último pleno eu pedín expresamente ó Grupo de Goberno que reclamase ante Telefónica para que se poñan os medios técnicos para posibilitar que a banda ancha chegue a todos os puntos do Concello. Aconséllolles ós afectados que protesten diante do Concello, mellor por escrito, e se queren facerme saber a min do seu interese por este asunto mellor.

Por unha Taboadela moderna!

Xosé Antón Vila.

O alcalde súbese o soldo

No día de hoxe celebrouse un pleno no que se debatiron os seguintes puntos:

1) Subida de soldo do alcalde, que pasa de percibir 900 € a 1600. Por suposto iso non significa que vaia traballar mais, "seguirei facendo o mesmo" manifestou ante a miña pregunta. Tampocuo tubo a delciadeza de ausentarse do pleno àra debatir e votar este punto.

2) Subidas das cantidades percibidas por asistencias a plenos e comisións. Pretendiase subir de 70 a 200 € a cantidade que cada concellal cobra por asistencia a pleno. Eu manifestei o meu desacordo ( o mesmo que o resto da oposición) e indiqueille ó alcalde que me parecía mais oportuno manter a retribución actual, mais que suficiente, e abrir unha partida presupostaria para cada grupo político para pagar gastos de funcionamento (fotocopias, cartazes, folios, CDs, gastos en comunicacións, etc). Afortunadamente pareceulle ben e decidiu retirar o punto e estudialo.

3) Modificación da plaza de alguacil. Decidiuse aumentar a súa categoría de nivel 9 a 14 e incorporarlle como complemento específico unha cantidade (160 €) que actualmente percibia de xeito un pouco "iregular". Aprobouse por unanimidade xustificando no traballo da persoa que ocupa o posta actualmente (fai funcións polas tarde e mesmo os fins de semana, e asiste a grigda de extinción de incendios no verán)

4) Presupostos anuais. O presuposto ascende a algo ais de 1.100.000 € dos cais o apartado de persoal se come case a terceira parte. Non hai apenas partidas para axudas sociais e actividades culturais. Non hai xustificación para case ningunha partida. En resumen é un presuposto "para cubrir a papeleta" e pouco mais.Opuxémosnos toda a oposición.

Xosé Antón Vila.

O PXOM xa deixou a mesa do alcalde

Compráceme informarvos que o PXOM xa deixou a mesa do alcalde para coller o Camiño de Santiago.

Non sei quen conseguiu convencer ó alcalde da que era preciso aprobar o PXOM polo ben de todos pero o feito é que no pleno extraordinario do pasado xoves a aprovamos. Eu teño unha copia dixital do mesmo, que poño a disposición de todos os interesados.

Aproveito para informar tamén de que mañán hai outro pleno no que se pretende aprobar os presupostos para este ano e facer algunha modificacións interesantes: soldo do alcalde, asignación dos concellales por asistencias a plenos e comisións, modificacións na plaza de alguacil ... manterievos informados do resultado.

Xosé Antón Vila.

O PXOM queda sobre a mesa

O luns día 31 de marzo era o día sinalado para que o PXOM superase o trámite da súa aprobación no pleno e fose remitido á Xunta. Para sorpresa de todos non foi así.

Os grupos da oposición foron explicando o sentido do seu voto (abstención do PSOE, voto en contra do VETA e voto a favor do BNG) coincidindo todos eles nas súsa críticas ó grupo de goberno na maneira en que fora tramitado o plan (lento, sin información á oposición, posiblemente sen negociar todas as melloras posibles, etc). Eu, como concellal do BNG decidín ainda así votar a favor porque entendía que neste momento o que cumpre é mirar cara adiante e dispor dun PXOM, non o que todos desexariamos pero algo.

O mellor veu despois destas intervencións cando o Alcalde, para sorpresa de todos, dixo que non estaba disposto asumir el todas esas críticas e que nesas condicións non aprobaba o plan, textualmente dixo "queda sobre a mesa".

Esa frase vai facer historia en Taboadela pois ultimamente todo queda sobre a mesa... as marquesinas, as normas para o uso dos velorios ... ata as aprobacións de enganches de auga.

O malo disto é que as cousas vanse acumulando enriba da mesa do Sr. Alcalde e penso que debe de ser isto o que lle impide ver que o Concello acumula cada día mais atraso respecto doutros do seu entorno.

Xosé Antón Vila

Paso adiante no PXOM

Mais dun ano despois de que a Xunta rechazara o Plan Xeral de Ordenación Municipal de Taboadela está lista a nova proposta de PXOM e pasará polo Pleno o luns día 31 de marzo.

Básicamente é unha versión recortada do anterior, case sin zonas residenciais e cas areas de ampliación dos núcleos urbáns mais pequenas. Tamén se ampliaron as áreas de protección de infraestructuras e se mellorou o informe patrimonial.

Eu teño unha copia do mesmo e vou pedir no pleno do luns que se expoña no Concello e se coloquen bandos avisándo á xente.

Está clare que alguén debería asumir a responsabilidade pola tardanza (Concello, empresa redactora, Xunta, ...).